ప్రస్తుతం బరువు పెరగడం వల్ల అనేక ఆరోగ్య సమస్యలు వస్తున్నాయి. ఆరోగ్యం కాపాడుకోవాలంటే బరువు తగ్గించుకోవాలి. ఇందుకోసం చాలామంది సులభ పద్దతులు వెతికే పనిలో పడుతున్నారు. ఈ నేపథ్యంలోనే అల్పాహారం మానేస్తే బరువు తగ్గుతారని YouTube షార్ట్లో క్రియేటర్స్ పోస్ట్ చేస్తున్నారు. మరి ఇందులో నిజం ఉందా? బరువు తగ్గేందుకు అల్పాహారం మానేయడం సరైందేనా? డాక్టర్స్ ఏమంటున్నారు.
యూట్యూబ్ షాట్స్లో ఓ వ్యక్తి తాను బరువు తగ్గేందుకు అల్పాహారం మానేసినట్లు తెలిపాడు. 12ఏళ్లుగా తాను అల్పాహారం మానేసినట్లు తెలిపాడు. దీనివల్ల త్వరగా బరువు తగ్గానని అన్నారు. దీంతో పాటు చాలా లాభాలు ఉన్నాయని చెప్పాడు. ఆయన ప్రకారం అల్పాహారం మానేయడం వల్ల సంతృప్తిగా భోజనం చేయొచ్చొని తెలిపారు. దీంతో పాటు ఉదయాన్నే అల్పాహారం ఏం చేయాలనే కంగారు ఉండదని, ఆనందంగా పనులు చేసుకోవచ్చని, దీంతో పాటు రోజంతా ఉత్సాహంగా ఉంటుందని తెలిపారు. అంతే కాకుండా దీని వల్ల మలబద్ధకం సమస్య కూడా రాదని చెబుతున్నాడు. మరి ఈ వీడియోలో చెప్పినదాంట్లో నిజమెంత?
బరువు తగ్గడానికి అల్పాహారం మానేయడం అనేది ఒక్కొక్కరి శరీరం తత్వం మీద ఆధారపడి ఉంటుంది. ఒక్కోసారి మనం అనుకోకుండా అల్పాహారం తీసుకోలేము. ఇది కొంత మందికి మేలు చేస్తే మరి కొంత మందికి సమస్యల్ని తీసుకొస్తుంది. అదెలాగంటే కొంత మంది అల్పాహారం మానేస్తే మధ్యాహ్నం వరకూ ఆకలితో ఉంటారు. దీంతో ఎక్కువగా తింటారు. ఇది ఆకలిని కలిగించే హార్మోన్ అధికంగా ఉత్పత్తి కారణంగా వస్తుంది. దీంతో బరువు పెరుగుతారు.
అంతేకాదు శరీరానికి రోజుకి కావాల్సిన శక్తి అందడానికి అల్పాహారం కీ మీల్. ముఖ్యంగా అల్పాహారం తీసుకుంటే రోజంతా ఎంతో యాక్టివ్గా ఉంటారు. అందుకే తీసుకోవాలి. అయితే కొంతమంది తిన్నా తినకపోయినా యాక్టివ్గానే ఉంటారు. ఏదేమైనా బరువు తగ్గేందుకు అల్పాహారం మానేసే ముందు డాక్టర్ సలహా తీసుకోవడం మంచిది. అతను మిమ్మల్ని పరీక్షించి మీకున్న సమస్యలతో అల్పాహారం తీసుకోవచ్చా లేదా అనేది చెబుతారు.
అల్పాహారం కూడా ఆరోగ్యంగా తీసుకోవాలి. ప్రోటీన్, ఫైబర్ కలిసిన సమతుల ఆహారం ఉండాలి. దీంతో బరువు తగ్గుతారు. తినే ఆహారం విషయంలో నిర్లక్ష్యం వద్దు. తినడానికి ముందు మంచి న్యూట్రిషనిస్ట్ సలహా తీసుకుంటే ఆరోగ్యవంతమైన జీవనం అలవాలవుతుంది. బరువు కూడా తగ్గడానికి సహాయపడుతుంది.
బరువు తగ్గాలి అనుకున్నప్పుడు తగిన విధంగా జీవన విధానం అలవాటు చేసుకోవాలి. అంతేకానీ దగ్గర మార్గాలు ఉండవు. కాస్తా హార్డ్వర్క్ చేసినప్పుడు మంచి రిజల్ట్స్ ఉంటాయి. తగ్గిన బరువు పెరగకుండా చేసుకోవాలి. అలా కాకుండా బరువు తగ్గాం కదా అని మళ్లీ జంక్ ఫుడ్ తినడం, అనారోగ్య జీవన విధానం కొనసాగిస్తే మరిన్ని ఇబ్బందులు వస్తాయి. నేటి కాలంలో ఇంటర్నెట్లో వచ్చే ప్రతి విషయం నిజమేనని భ్రమపడొద్దు. వాటిని నమ్మి ఫాలో అయ్యే ముందు నిపుణుల సలహా తీసుకోవడం మంచిది. దీని వల్ల మంచి ఫలితాలు పొందుతారు.
