చిత్రం : చి.ల.సౌ.
నటీనటులు : సుశాంత్, రుహాని శర్మ, వెన్నెల కిశోర్, రోహిణి, అను హసన్, సంజయ్ స్వరూప్
సంగీతం : ప్రశాంత్ విహారి
దర్శకత్వం : రాహుల్ రవీంద్రన్
నిర్మాత : అక్కినేని నాగార్జున, జస్వంత్ నాడిపల్లి, భరత్ కుమార్
ఇంటర్నెట్ : రాహుల్ రవీంద్రన్ అందాల రాక్షసి సినిమాతో హీరోగా చిత్రపరిశ్రలో అడుగు పెట్టారు. ఆతర్వాత కూడా నటుడిగా కొనసాగుతూనే దర్శకుడిగానూ తన అదృష్టాన్ని పరీక్షించుకుంటున్నారు. ఓ మంచి హిట్ కోసం చాలాకాలంగా ఎదురుచూస్తున్న అక్కినేని వారసుడు సుశాంత్ హీరోగా ‘చి.ల.సౌ.’ సినిమాను రాహుల్ తెరకెక్కించారు. సున్నతిమైన ప్రేమకథగా తెరకెక్కిన సినిమా నచ్చటంతో అన్నపూర్ణ బ్యానర్పై అక్కినేని నాగార్జున రిలీజ్ చేశారు. నాగార్జునను అంతగా మెప్పించిన అంశాలు చి.ల.సౌ.లో ఏమున్నాయి..? ఈ సినిమాతో సుశాంత్ హిట్ ట్రాక్లోకి వచ్చాడా..? దర్శకుడిగా తొలి ప్రయత్నంలో రాహుల్ రవీంద్రన్ సక్సెస్ అయ్యాడా..? అంటే కథలోకి వెళ్లాల్సిందే.
కథ : ఇప్పటి వరకు ప్రేమకథలు చూశాం. కానీ ఈ సినిమా రొటీన్గా ఉన్నప్పటికీ భిన్నంగా చిత్రీకరించారు. సినిమా మొత్తం పెళ్లి చూపులు, పెళ్లి చుట్టూనే తిప్పారు. మరో ఐదేళ్ల వరకు పెళ్లే వద్దని పట్టుపట్టి కూర్చున్న అర్జున్ (సుశాంత్)ని ఎలాగైన పెళ్లికి ఒప్పించాలని అమ్మానాన్నలు (అను హసన్, సంజయ్ స్వరూప్) ప్రయత్నిస్తుంటారు. ఇంట్లో పోరు సరిపోలేదన్నట్టుగా తన బెస్ట్ ఫ్రెండ్ సుజిత్ (వెన్నెల కిశోర్) కూడా అర్జున్ను పెళ్లి చేసుకోమని బలవంతపెడుతుంటాడు. వీళ్ల పోరు పడలేక ఓ అమ్మాయితో పెళ్లిచూపులుకు ఒప్పుకుంటాడు అర్జున్. రొటీన్ పెళ్లి చూపులు లా కాకుండా కాస్త డిఫరెంట్ గా ప్లాన్ చేసిన పేరెంట్స్.. అర్జున్ను ఒక్కడినే ఇంట్లో ఉంచి అమ్మాయి వస్తుంది మాట్లాడమని చెప్తారు. అంజలి (రుహాని శర్మ) ఎన్నో బాధ్యతలు ఉన్న మధ్యతరగతి అమ్మాయి. చిన్నతనంలోనే తండ్రి చనిపోవటంతో కుటుంబానికి తానే పెద్ద దిక్కు అవుతుంది. అంజలిని చూసిన అర్జున్ పెళ్లికి ఒప్పుకున్నాడా..? లేక తన మాట ప్రకారం ఐదేళ్ల వరకు పెళ్లి వాయిదా వేశాడా..? అసలు వాళ్ల పెళ్లి చూపులు ఎలా జరిగింది..? అన్నదే మిగతా కథ.
నటీనటులు : చాలా మంది నటులు ఉన్నప్పటికీ హీరో, హీరోయిన్ అర్జున్, అంజలిల చుట్టూనే తిరుగుతుంది. అర్జున్ పాత్రలో సుశాంత్ సహజంగా నటించాడు. గత చిత్రాలతో పోలిస్తే మంచి పరిణతి చూపించాడు. కామెడీ టైమింగ్లో ఆకట్టుకున్నాడు. విభిన్న ధోరణితో తెరకెక్కిన ప్రేమకథ కావటంతో డ్యాన్స్లు, ఫైట్లు చేసే ఛాన్స్ రాలేదు. సుశాంత్ నటన పరంగా మాత్రం ఫుల్ మార్క్ సాధించాడు. హీరోయిన్ గా పరిచయమైన రుహాని శర్మ తొలి సినిమాతోనే సూపర్బ్ అనిపించుకుంది. అర్జున్ మీద ఇష్టమున్నా కుటుంబ బాధ్యతల కారణంగా అవుననలేక, కాదనలేక మదన పడే పాత్రలో మంచి నటన కనబరిచింది. అందం, అభినయం రెండింటితోనూ మెప్పించింది. వెన్నెల కిశోర్ తన మార్క్ కామెడీ డైలాగ్స్, బాడీ లాంగ్వేజ్తో నవ్వించాడు. హీరోయిన్ తల్లిగా రోహిణి, హీరో తల్లి దండ్రులుగా అను హసన్, సంజయ్ స్వరూప్, ఇతర పాత్రల్లో విద్యుల్లేఖ రామన్, జయప్రకాష్ నటనలు ఆకట్టుకున్నాయి.
విశ్లేషణ : దర్శకుడిగా రాహుల్ రవీంద్రన్ తొలి ప్రయత్నంలోనే విభిన్న సినిమాతో ప్రేక్షకుల ముందుకు వచ్చాడు. రొటీన్ ప్రేమకథలకు భిన్నంగా పెళ్లిచూపులతో మొదలయ్యే ప్రేమకథతో ఆకట్టుకున్నాడు. దర్శకుడిగానే కాకుండా రచయితగానూ మంచి మార్కులు సాధించాడు. టేకింగ్లోనూ కొత్త దనం చూపించాడు. అయితే ఇద్దరు వ్యక్తుల మధ్య ఒక్క పూటలో జరిగే సంఘటనల నేపథ్యంలో కథను తయారు చేసుకున్న దర్శకుడు, కథనాన్ని కాస్త నెమ్మదిగా నడిపించాడు. మొదటి అర్ధభాగంలో వెన్నెల కిశోర్, సుశాంత్ల కాంబినేషన్లో వచ్చే కొన్ని సీన్స్ బోర్ అనిపిస్తాయి. పెళ్లిచూపుల సీన్ మొదలైన తరువాత కథనం ఇంట్రస్టింగ్ మారుతుంది. సినిమాకు సినిమాటోగ్రఫి మరో ప్రధాన బలం. షూటింగ్ పెద్దగా లోకేషన్లు లేకపోయినా ఆకట్టుకునేలా తెరకెక్కించారు. ప్రశాంత్ విహారి అందించిన సంగీతం ప్రేమక్షకులను మెప్పించింది. ముఖ్యంగా నేపథ్య సంగీతం కొత్త అనుభూతి కలిగిస్తుంది. సినిమా స్థాయికి తగ్గట్లు ఎడిటింగ్, నిర్మాణ విలువలు సినిమాకు తగ్గట్టుగా ఉన్నాయి.
అనుకూల అంశాలు : కథా కథనం, ప్రధాన నటీనటుల నటన, కామెడీ
ప్రతికూల అంశాలు : ఎడిటింగ్, మొదటి అర్ధభాగంలో కొన్ని బోర్కొట్టే సన్నివేశాలు
గమనిక : సమీక్షలోని అంశాలని వెబ్సైట్ అడ్మిన్ గమనించిన అభిప్రాయాలు మాత్రమే.
