చెన్నై : నయనతార ప్రధాన పాత్ర పోషిస్తున్న చిత్రం ‘కోలమావు కోకిల’. మత్తుపదార్థాల స్మగ్లింగ్‌ కథాంశంతో ఈ సినిమాను నెల్సన్‌ దిలీప్‌కుమార్‌ దర్శకత్వంలో తెరకెక్కించారు. హాస్య నటుడు యోగిబాబు కథానాయకుని పాత్ర పోషిస్తున్నారు. నయనతారను ప్రేమించే వ్యక్తిగా కనిపిస్తారు. నయన్‌కు ప్రేమను వ్యక్తపరిచే గీతాన్ని ఇటీవల విడుదల చేశారు. చిత్రానికి అనిరుధ్‌ సంగీతం సమకూర్చారు. ఈ పాటకు మంచి గుర్తింపు లభించింది. తాజాగా చిత్రం ట్రైలర్‌ను విడుదల చేశారు.
ఇదిలా ఉండగా ఆ సినిమా గురించి యోగిబాబు మాట్లాడారు. ‘సాధారణంగా ఉన్నత స్థాయికి వెళ్లిన కథానాయికలు.. నాలాంటి హాస్య నటుడితో కలిసి నటించడానికి అంగీకరించరు. అందులోనూ ఆమె వెంటపడి ప్రేమించే వ్యక్తి పాత్రకైతే అస్సలు ఒప్పుకోరు. కానీ నయనతారకు పెద్ద మనసుంది. అందుకే నాతో కలిసి ‘కోలమావు కోకిల’లో నటించడానికి ఒప్పుకున్నారు. ఇలాంటి మనసు నయనతారకు మాత్రమే ఉంది. చిత్ర పరిశ్రమలో నాకు నచ్చిన కథానాయిక కూడా ఆమే’ నని తెలిపారు.
కేఎం సర్జున్‌ దర్శకత్వంలో నయనతార కథానాయిక ప్రాధాన్యత ఉన్న మరో సినిమాలో నటించడానికి ఇటీవల అంగీకరించారు. అందులోనూ ముఖ్యమైన పాత్రలో నటింపజేయడానికి యోగిబాబును నయన్‌ సిఫార్సు చేశారు.
