హైదరాబాద్‌ : ఆది పినిశెట్టి కథానాయకుడిగా నటిస్తున్న చిత్రం ‘నీవెవరో’లో తాప్సి, రితికా సింగ్‌ కథానాయికలుగా నటించారు. కోన ఫిలిమ్‌ కార్పొరేషన్‌, ఎంవివి సినిమా పతాకాలపై కోన వెంకట్‌, ఎంవివి సత్యనారాయణ నిర్మిస్తున్న చిత్రానికి హరినాథ్‌ దర్శకత్వం వహిస్తున్నారు. ‘మూడు నగరాలు.. రెండు ప్రేమకథలు.. ఒక్క సంఘటన’ అంటున్నారు ఆది పినిశెట్టి.
ప్రముఖ దర్శకుడు కొరటాల శివ ఈ సినిమా ఫస్ట్ లుక్ ను ఇటీవలే విడుదల చేశారు. టీజర్‌ను ఆదివారం యూట్యూబ్‌లో విడుదల చేశారు. సస్పెన్స్‌ థ్రిల్లర్‌గా ఈ సినిమాను తెరకెక్కిస్తున్నట్లు ఈ టీజర్ ను చూస్తుంటే తెలుస్తోంది. పై డైలాగ్‌తో ప్రారంభమైన టీజర్ ఆద్యంతం ఆసక్తికరంగా ఉంది. ‘ఇది ప్రమాదం కాదు సర్‌.. ఇది హత్య’ అంటూ ఓ మహిళ పోలీసులకు చెబుతుంది.
‘ఈ ప్రపంచంలో ప్రతి సమస్యకు సమాధానం ఏదో ఒక రూపంలో వస్తుంది. నాకు ఏ రూపంలో వస్తుందో చూడాలి’ అంటూ ఆది పినిశెట్టి తీవ్రంగా ఆలోచిస్తున్నారు. ‘వీడ్ని స్కెచ్‌ వేసి చంపింది అమెరికా ప్రెసిడెంట్ డొనాల్డ్‌ ట్రంప్‌, నార్త్‌ కొరియా ప్రెసిడెంట్ కిమ్. ‘కిమ్ అయినా.. ట్రంప్‌ అయినా లోపలేసి కుమ్ముతా’ అంటూ వెన్నెల కిషోర్ చెప్పిన డైలాగుల తీరు తనలోని హీరోయిజాన్ని బయట పెట్టింది.
