హైదరాబాద్ : విజయ్‌ దేవరకొండ హీరోగా నటించిన ‘గీత గోవిందం’ సినిమా బాక్సాఫీసు వద్ద క‌లెక్ష‌న్ల‌లో దూసుకుపోతోంది. ప్ర‌స్తుతం ఈ సినిమా రూ.75 కోట్ల (గ్రాస్‌) క్లబ్లో అడుగుపెట్టిన‌ట్లు చిత్ర బృందం ప్ర‌క‌టించింది. విదేశాల్లోనూ అద్భుతంగా రాణిస్తోందని సినీ విశ్లేషకుడు తరణ్‌ ఆదర్శ్ చెబుతున్నారు. విడుదలైన వారంలోనే వసూళ్ల విషయంలో ఏమాత్రం త‌గ్గ‌లేద‌ని అంటున్నారు.
గ‌త సోమవారం (ఆగస్టు 20)న ఈ చిత్రం 49,721 డాలర్లు, మంగళవారం 119,247 డాలర్లు రాబట్టినట్లు తరణ్‌ తెలిపారు. సోమవారం వసూళ్ల కంటే మంగళవారం వసూళ్లు 140 శాతం ఎక్కువ ఉండ‌టం విశేషమన్నారు. మంగళవారానికి సినిమా అమెరికాలో 1,715,139 డాలర్లు (రూ.11.98 కోట్లు) రాబట్టినట్లు ట్విట్ట‌ర్‌లో పేర్కొన్నారు.
ప‌ర‌శురాం ద‌ర్శ‌క‌త్వం వ‌హించిన ‘గీత గోవిందం’ సినిమాకు రష్మిక కథానాయికగా న‌టించారు. బ‌న్నీవాసు జీఏ2 పిక్చర్స్‌ పతాకంపై నిర్మించిన సినిమాను అల్లు అరవింద్‌ సమర్పించారు. బాణీలు గోపీ సుందర్‌ అందించారు. ఆగస్టు 15న ప్రేక్షకుల ముందుకు వచ్చింది. ఈ సినిమా విమర్శకుల నుండి ప్రశంసలు అందుకుంది. సినిమా చక్కగా ఉందని ప్రముఖులు సైతం మెచ్చుకోవ‌డం విశేషం.
