హైదరాబాద్ : అత‌ను త‌మిళ హీరో. అయితేనేం… తెలుగులోనూ మంచి మార్కెట్ ఏర్పరచుకున్న కథానాయకుడు. అత‌నే కార్తీ. అత‌ను పాండిరాజ్‌ దర్శకత్వంలో కార్తీ రైతు పాత్రలో నటించిన చిత్రం ‘చినబాబు’. చిత్రాన్ని సూర్య నిర్మిస్తున్నారు. సాయేషా సైగల్ హీరోయిన్‌. ఈ సినిమా ప్రేక్షకుల ముందుకు శుక్రవారం రాబోతోంది.
ఈ సినిమాకు సంబంధించిన ఓ సన్నివేశాన్ని బుధవారం విజయ్ దేవరకొండ విడుదల చేశారు. 3.41 నిమిషాల నిడివిగల ఈ చిత్రంలో రైతు విలువ వివ‌రిస్తూ కార్తీ కనిపించారు. రైతు వేషంలో కార్తీ గెటప్‌ ఆకట్టుకుంది. ‘ఒక్క రోజు రైతులా ఉండి చూడు.. వద్దులే, ఒక్క రోజు రైతుతో ఉండి చూడు’ అనే డైలాగ్‌ హైలైట్‌గా నిలిచింది. దీన్ని విజయ్ దేవరకొండ ట్విటర్‌ వేదికగా షేర్‌ చేశారు. ‘మా తాతలు రైతులు, నా 4వ తరగతి వరకు మా నాన్న కూడా రైతే. మళ్లీ ఎప్పటికైనా వ్యవసాయం చేయాలి అనేది ఆయన కల. నా అభిమాన నటుడు (కార్తీ) నటించిన, నాకు ఎంతో నచ్చిన నటుడు (సూర్య) నిర్మించిన సినిమా ‘చినబాబు’. వారి సినిమాకు సంబంధించిన ప్రచార చిత్రాన్ని నేను విడుదల చేయడం సంతోషంగా ఉంది’ అని విజయ్ ట్వీట్ చేశారు.
దీంతో ట్విట్ట‌ర్ వేదికగా సూర్య.. విజయ్‌కు ధన్యవాదాలు చెప్పారు. విజయ్ సినిమాల్లో ఎంచుకునే తీరు, నటనను అభినందించారు. విజయ్ ప్రతిస్పందిస్తూ.. ‘మీ నుంచి కాస్త క్రమశిక్షణ నేర్చుకోవాలి’ అని ట్వీట్ లో బ‌దులిచ్చారు.
