టంగుటూరు : అవినీతి, అసమర్ధతను కప్పిపుచ్చుకోవడానికే చంద్రబాబు శ్వేత పత్రాలు ఇస్తున్నారని వైఎస్సార్ సీపీ జిల్లా అధికార ప్రతినిధి బొట్ల రామారావు ఆరోపించారు. టంగుటూరు కార్యాలయంలో సోమవారం జరిగిన విలేకర్ల సమావేశంలో ఆయన మాట్లాడారు. శ్వేత పత్రాల పేరుతో చంద్రబాబు ప్రభుత్వం చేస్తున్న హడావుడి ప్రజలను మభ్యపెట్టేందుకేనని పేర్కొన్నారు. అబద్ధాలను శ్వేత పత్రాల రూపంలో ప్రచారం చేసుకోవడం దుర్మార్గమన్నారు. ప్రభుత్వ అవినీతి, అక్రమాల దోపిడీని, రాజధాని, పోలవరం, పట్టిసీమ ప్రాజెక్టులో విపరీతమైన అవినీతి చోటుచేసుకుందన్నారు.
చంద్రబాబు ఇప్పటివరకు 600 హామీలు ఇచ్చి ఒక్క హామీని కూడా సక్రమంగా అమలు చేయలేదన్నారు. 111 పథకాలు ప్రకటించి, ఒక్క పథకాన్ని సక్రమంగా నిర్వహించ లేక, వైఫల్యం చెంది, శంకుస్థాపనల పేరుతో మరో కొత్త నాటకానికి సిద్ధమయ్యారని అన్నారు. కడప ఉక్కు ఫ్యాక్టరీ, జిల్లాలో యూనివర్సిటీ, రామాయపట్నంలో పోర్టు, ఏషియన్ పేపర్ పరిశ్రమల శంకుస్థాపనకు సిద్ధపడటం మరోసారి మోసం చేసేందుకేనన్నారు. జిల్లాలో 2002లో ఐరన్ ఓర్ ఫ్యాక్టరీ శంకుస్థాపన,
మర్లపాడులో వేసిన శిలాఫలకాలు మాటలకే పరిమితమయ్యాయని గుర్తుచేశారు.
చంద్రబాబు గతంలో ఇచ్చిన హామీలు, శంకుస్థాపనలపై శ్వేత పత్రం విడుదల చేయాలని కోరారు. కేంద్ర రాష్ట్ర ప్రభుత్వాలు ఒకరినొకరు విమర్శించుకుంటూ ప్రజలను మోసం చేస్తున్నారన్నారని పేర్కొన్నారు. సమావేశంలో ఆ పార్టీ జిల్లా ప్రధాన కార్యదర్శి లింగంగుంట రవిబాబు, వల్లూరమ్మ ట్రస్ట్ బోర్డ్ చైర్మన్ సూరం రమణారెడ్డి, ఎంపిటిసి ఏల్చూరి మాధవరావు, టి వెంకటేశ్వర్లు, కె వెంకటేశ్వర్లు పాల్గొన్నారు.
