టంగుటూరు : జగన్ తో కేటీఆర్ కలవడాన్ని రాద్ధాంతం చేస్తున్న చంద్రబాబు విష ప్రచారాన్ని మానుకోవాలని వైయస్సార్ సిపి కొండేపి నియోజకవర్గ ఇన్చార్జ్ డాక్టర్ మాదాసి వెంకయ్య చెప్పారు. టంగుటూరులో శుక్రవారం జరిగిన విలేకరుల సమావేశంలో ఆయన మాట్లాడారు. జాతీయ స్థాయిలో కాంగ్రెస్-బిజెపికి ప్రత్యామ్నాయంగా ఫెడరల్ ఫ్రెంట్ ఏర్పాటుకు మద్దతు కోరుతూ టిఆర్ఎస్ వర్కింగ్ ప్రెసిడెంట్ కేటీఆర్, వైఎస్ఆర్ సీపీ అధ్యక్షులు వైయస్ జగన్ మోహన్ రెడ్డిని లోటస్ పాండ్ లోని జగన్ నివాసంలో కలిశారని పేర్కొన్నారు.
వైయస్సార్ సిపి టిఆర్ఎస్ తో పొత్తు కుదుర్చుకుందని టిడిపి దుష్ప్రచారం చేస్తుందన్నారు. టిడిపి విష ప్రచారాన్ని తీవ్రంగా ఖండిస్తున్నట్లు పేర్కొన్నారు. విభజనకు సమ్మతిస్తూ ఆ నాటి హోం మంత్రి ప్రణబ్ ముఖర్జీకి ఉమ్మడి ఆంధ్రప్రదేశ్ ప్రతిపక్ష నేతగా ఉన్న చంద్రబాబు లేఖ ఇవ్వడం, తిరిగి కాంగ్రెస్ మోసం చేసిందని ఉపన్యాసాలు చేసి, బీజేపీతో జతకట్టి ఎన్నికల్లో గెలిచిన టిడిపి రోజుకొక రంగు మారుస్తూ గోబెల్స్ ప్రచారం చేయడం విడ్డూరంగా ఉందన్నారు. జగన్ మొదటి నుండి ప్రత్యేక హోదా రాష్ట్రానికి సాధించడమే ద్యేయంగా బిజెపి, టీడీపీ వైఖరిని ఖండిస్తూ అలుపెరుగని పోరాటం చేస్తుంటే, చంద్రబాబు యూటర్న్ తీసుకుని తన దుర్మార్గ రాజకీయ క్రీడను మరోసారి వ్యక్తపరిచారన్నారు. జగన్ ప్రత్యేక హోదా ఎవరు ఇస్తారో వారికే కేంద్రంలో మద్దతిస్తామని చెప్పారన్నారు. వైఎస్ఆర్ పార్టీకి ప్రజలల్లో వస్తున్న ఆదరణను చూసి భయపడి, ప్రాంతీయ భేదాన్ని రెచ్చగొట్టి ఎన్నికల్లో లబ్ధి పొందాలని చంద్రబాబు పసలేని విమర్శలు చేస్తున్నారన్నారు.
కేంద్రంలో రెండు మంత్రి పదవులతో బిజెపితో నాలుగు సంవత్సరములు అంటకాగిన చంద్రబాబు రాష్ట్ర ప్రయోజనాలకు తీవ్ర విఘాతం కల్గించి, తనకున్న అధికార బలంతో మీడియాకు తప్పుడు సమాచారం ఇస్తూ వైఎస్ఆర్ పార్టీని తూలనాడడం ప్రజలు గమనిస్తూనే ఉన్నారన్నారు. టిఆర్ఎస్ తో పొత్తు అనేది చాలా అసందర్భమైన ప్రస్తావన, టిఆర్ఎస్ వచ్చి ఏపీ ఎన్నికల్లో పోటీ చేసేది లేదు, ఏపీకి ప్రత్యేక హోదా విషయంలో కేసీఆర్ మద్దతుగా నిలబడుతున్న నేపథ్యంలో వారితో మనం సఖ్యతగా ఉండటం మంచిదో కాదో ప్రజలకు తెలియంది కాదన్నారు. కేసీఆర్ ఫెడరల్ ఫ్రంట్ వల్ల మన రాష్ట్రానికి హోదా విషయంలో మద్దతు తెలుపుతామంటే దాన్ని మనం స్వాగతించాలా లేదా అనేది ప్రజలకు గుర్తిస్తారన్నారు. విలేకర్ల సమావేశంలో వైఎస్సార్ సీపీ జిల్లా అధికార ప్రతినిధి బొట్ల రామారావు, సూరం రమణారెడ్డి, సూదనగుంట శ్రీహరి, చింతపల్లి హరిబాబు, కె రమేష్, ప్రభుదాస్, కె వెంకటేశ్వర్లు, అంకరాజు పాల్గొన్నారు.
