చీరాల (Chirala) : మండలంలోని పాత చీరాలలోని డాక్టర్‌ వైఎస్‌ఆర్‌ DrYSR) విగ్రహం వద్ద కూటమి ప్రభుత్వం వైద్య కాలేజీల ప్రైవేటీకరణను నిరసిస్తూ వైసిపి (YSRCP) ఆధ్వర్యంలో ప్రజా ఉద్యమ కోటి సంతకాల సేకరణ, రచ్చబండ సోమవారం నిర్వహించారు. ఈ సందర్భంగా వైసిపి ఇంచార్జ్ కరణం వెంకటేష్ బాబు మాట్లాడారు. ప్రభుత్వ వైద్య కాలేజీలు ప్రైవేటీకరించడం ప్రజలకు తీవ్ర నష్టం చేస్తుందని అన్నారు. ప్రజల కోసం అందించిన ఆరోగ్య హక్కులను ప్రభుత్వం దెబ్బతీస్తుందని విమర్శించారు. ప్రజల మద్దతుతోనే ఈ నిరసన ఉద్యమాన్ని మరింత బలోపేతం చేస్తామని అన్నారు.
రేపల్లె (Repalle): వైద్య కళాశాలల ప్రైవేటీకరణకు వ్యతిరేకంగా వైసిపి చేపట్టిన కోటి సంతకాల సేకరణ వైసిపి టౌన్ కన్వీనర్ కరేటి శేషగిరిరావు సోమవారం నిర్వహించారు. ఈ సందర్భంగా కౌన్సిలర్ చదలవాడ శ్రీనివాసరావు మాట్లాడుతూ పేదలకు వైద్యం అందించాలనే ఉద్దేశంతో మాజీ సిఎం జగన్‌ వైద్య కళాశాలలు ఏర్పాటు చేస్తే వాటి నిర్మాణం పూర్తి చేసేందుకు డబ్బులు లేవని సిఎం చంద్రబాబు పిపిపి పేరుతో ప్రైవేటీకరణ చేయడం తగదన్నారు. బహుళ జాతి సంస్థలకు రూ.కోట్ల విలువైన భూములు నామమాత్రంగా కట్టబెట్టడం, ప్రతినెల రూ.10వేల కోట్లు అప్పు చేయడం చేతనైన సిఎంకు పేదల కోసం వైద్య కళాశాలలు ఏర్పాటు చేయడం చేతకాలేదాని ప్రశ్నించారు. వీటిని ప్రైవేటీకరిస్తే తర్వాత జగన్‌ నాయకత్వంలో వైసిపి ప్రభుత్వం వీటిని రద్దు చేస్తుందని అన్నారు. కార్యక్రమంలో వైసిపి నాయకులు చిత్రాల ఓబేదు, పట్టెం శ్రీనివాసరావు, నీలం వీరేంద్ర, సముద్రాల ప్రభుకిరణ్, నీల నాంచారయ్య, వీసం నాగలక్ష్మి, కౌన్సిలర్ ఆనంద్, ఆల రాజ్‌పాల్‌, ఖాదర్, ఖుద్దూస్, గౌస్, లాకత్ బాషా, నాగిశెట్టి పవన్ పాల్గొన్నారు.
