చీరాల : యుటిఎఫ్ మహిళా విభాగం ఆధ్వర్యంలో అంతర్జాతీయ మహిళా దినోత్సవంను స్థానిక ఎఆర్ఎం ఉన్నతపాఠశాల నందు ఘనంగా నిర్వహించారు. అంతర్జాతీయ మహిళా దినోత్సవాన్ని పురస్కరించుకొని పట్టణంలోని మున్సిపల్, ఎయిడెడ్ పాఠశాలల విద్యార్థులకు నేటి సమాజంలో మహిళల పాత్ర అనే అంశంపై వ్యాసరచన పోటీలు నిర్వహించి, గెలుపొందిన విద్యార్థులకు మొక్కలను ప్రధానం చేశారు. పట్టణ శాఖ మహిళా సహాధ్యక్షురాలు సిహెచ్ మాధవి మాట్లాడుతూ మహిళలు తమ హక్కుల పరిరక్షణకై పోరాటాలు చేయాల్సి వస్తుందని, పాలకవర్గాలు మహిళల హక్కుల పరిరక్షణకు తగిన కృషి చేయాలని కోరారు. రాజ్యాంగం కల్పించిన హక్కులను కాల రాసేందుకు ప్రయత్నించే వారిని కఠినంగా శిక్షించాలని అన్నారు. మహిళలపై జరుగుతున్న అకృత్యాలను ప్రతిఘటించాలని కోరారు.
యుటిఎఫ్ జిల్లా కౌన్సిలర్ వడ్డిముక్కల విజయలక్ష్మి మాట్లాడుతూ యుటిఎఫ్ మహిళలను విశేషంగా గౌరవిస్తుందన్నారు. ఉపాధ్యాయులందరూ యుటిఎఫ్ పట్ల అభిమానం చూపుతారని, భవిష్యత్తులో యుటిఎఫ్ కార్యక్రమాలలో మహిళలు చురుకుగా పాల్గొనాలని పిలుపునిచ్చారు. కార్యక్రమంలో వై ప్రసన్నకుమారి, కె సుశీల, ఆర్ రాణెమ్మ, వివి విజయలక్ష్మి, పి పల్లవి, శాంతిశ్రీ, తులసిదేవి, షేక్ ఫైరోజ్ బేగం, డి సుమలత, శివలక్ష్మి, రమాదేవి, దానమ్మ, సుకుమారి తదితర ఉపాధ్యాయినులు, పట్టణంలోని పలు పాఠశాలల విద్యార్థినులు పాల్గొన్నారు.
