ప్రకాశం : రాజ్యసభ సభ్యులు, రాంకీ గ్రూప్ ఆఫ్ కంపెనీస్ అధినేత ఆళ్ల అయోధ్యరామిరెడ్డిని రాష్ట్ర మధ్య విమోచన ప్రచార కమిటీ చైర్మన్, కారుమంచి మా ఊరు అభివృద్ధి కమిటీ అధ్యక్షులు వల్లంరెడ్డి లక్ష్మణరెడ్డి పెదకాకానిలోని ఎంపీ నివాసంలో మర్యాదపూర్వకంగా కలిశారు. ఈ సందర్భంగా కారుమంచి గ్రామంలో గత ఐదేళ్లుగా మాఊరు అభివృద్ధి కమిటీ ఆధ్వర్యంలో కొనసాగుతోన్న అభివృద్ధి పనులను లక్ష్మణరెడ్డి వివరించారు. అలాగే టంగుటూరు మండలంలోని కారుమంచిలో 24 ఎకరాల విస్తీర్ణంలో ఉన్న ఊరచెరువును సుందరంగా అభివృద్ధి చేయడంతో పాటు చుట్టూ ఫెన్సింగ్ ఏర్పాటు చేసినట్లు చెప్పారు. కారుమంచి అభివృద్ధిపై తనకు ఇదివరకే సమాచారం ఉందని, ఈ సందర్భంగా అభివృద్ధి కమిటీని, చెరువు చుట్టూ కొబ్బరి చెట్లు, పూలమొక్కలతో సుందరీకరణపై ఎంపీ అయోధ్యరామిరెడ్డి ప్రత్యేకంగా లక్ష్మణరెడ్డిని అభినందించినట్లు తెలిసింది. ఆంధ్రప్రదేశ్లో అత్యున్నతమైన ఆదర్శవంత గ్రామంగా కారుమంచిని తీర్చిదిద్దడంలో మాఊరు అభివృద్ధి కమిటీ అహర్నిశలు కష్టపడుతోందని లక్ష్మణరెడ్డి వివరించారు.
వీరి కలయికలో మాజీ ఎంపీ మోదుగుల వేణుగోపాలరెడ్డి మాట్లాడుతూ మద్యవిమోచన ప్రచార కమిటీ సూచనలను ఎప్పటికప్పుడు గమనిస్తున్నట్లు చెబుతూ ప్రభుత్వం వాటిని పూర్తిస్థాయిలో అమలుపరిస్తే అద్భుతమైన ఫలితాలొస్తాయని తెలిపినట్లు అలాగే ప్రస్తుత రాజకీయ పరిస్థితులను గురించి చర్చించినట్లు లక్ష్మణరెడ్డి తెలిపారు.
