చీరాల (Chirala) : జాతీయ, అంతర్జాతీయ స్థాయి క్రీడాకారులను తయారు చేయడానికి అన్ని విధాలుగా కృషి చేస్తున్నామని (MLA MM Kondaiah) ఎమ్మెల్యే కొండయ్య అన్నారు. స్థానిక ఎన్‌ఆర్‌ అండ్ పిఎం ఉన్నత పాఠశాల ఆవరణలో జరుగుతున్న 42వ రాష్ట్ర స్థాయి ఇంటర్ డిస్ట్రిక్ట్ టెన్నికాయిట్ పోటీల్లో విజేతలకు ఆదివారం బహుమతులు అందజేశారు. కూటమి ప్రభుత్వం అధికారంలోకి వచ్చిన తర్వాత ఈపాటికే పలు సార్లు జాతీయ స్థాయి పోటీలు నిర్వహించినట్లు తెలిపారు. తద్వారా స్థానిక క్రీడాకారులను ప్రోత్సహిస్తున్నామని పేర్కొన్నారు. అదే దిశగా రాష్ట్రస్థాయి పోటీల్లో 19 జిల్లాల నుండి వచ్చిన 200 మంది బాల, బాలికలకు అవసరమైన వసతులు టిడిపి అధికార ప్రతినిధి మహేంద్రనాథ్ ఆధ్వర్యంలో సమకూర్చినట్లు తెలిపారు.
క్రీడల్లో గెలుపు, ఓటములు సహజమని, పోటీల ద్వారా అనుభవం పెంపొందించుకుని ఉన్నత శిఖరాలు అధిరోహించాలని అన్నారు. అదే ఉద్దేశంతో ప్రతి క్రీడాకారుడు కృషి చేయాలని సూచించారు. విశ్వ విజేత శ్రీచరణిలా రాష్ట్రం గర్వించదగిన ఆణిముత్యాలుగా ఎదగాలని క్రీడాకారులను కోరారు. క్రీడల అభివృద్ధికి కృషి చేస్తున్న అసోసియేషన్ సెక్రటరీ సత్యనారాయణ, కోశాధికారి రమేష్, జిల్లా చైర్మన్ దేవరాజు, ఉపాధ్యక్షులు అలేఖ్య, కోశాధికారి కొల్లయ్యను అభినందించారు. కార్యక్రమంలో ఎఎంసి చైర్మన్ కౌతవరపు జనార్ధనరావు, నాయకులు తేలప్రోలు నాగేశ్వరరావు, పిక్కి నారాయణ, అనపర్తి వనజ, రత్నబాబుతో పాటు పలువురు క్రీడాకారులు పాల్గొన్నారు.
