సంగీత దర్శకుడిగా టాలీవుడ్‌కు పరిచయమై నటుడిగా, దర్శకుడిగా తనకంటూ ప్రత్యేక గుర్తింపు తెచ్చుకున్న బహుముఖ ప్రజ్ఞాశాలి ఆర్పీ పట్నాయక్. తన సంగీతంతో ఎన్నో సినిమాల సక్సెస్‌లో కీ రోల్‌ ప్లే చేసిన ఆర్పీ.. దర్శకుడిగా డిఫరెంట్ ఫార్మాట్‌ను ఎంచుకున్నాడు.
ఓ ఇంట్రస్టింగ్‌ సినిమాతో ప్రేక్షకుల ముందుకు వచ్చేందుకు తాజాగా రెడీ అవుతున్నాడు ఆర్పీ. ‘‘అలిషా’’ పేరుతో హారర్‌ థ్రిల్లర్‌గా ఈ సినిమాను తెరకెక్కిస్తున్నాడు. కొత్త సంవత్సరం సందర్భంగా ఈ సినిమా ఫస్ట్‌ లుక్‌ పోస్టర్‌ను రిలీజ్ చేశారు చిత్రయూనిట్. ఐ‌ఎస్‌ఎం ఎంటర్‌టైన్మెంట్స్‌ బ్యానర్‌పై డాక్టర్‌ సోనాల్ నిర్మిస్తున్న ఈ సినిమాకు రచన, దర్శకత్వం, సంగీతం బాధ్యతలను కూడా ఆర్పీనే చూస్తున్నాడు.
అనుష్‌ గోరక్‌ సినిమాటోగ్రాఫర్‌గా, ఎడిటర్‌గా పని చేస్తున్న ఈ సినిమాలో ఐశ్వర్య సాల్వి, వేదాంత్ సలూజా, రిచా కల్రా, అక్షయ్ బక్చు కీలక పాత్రల్లో నటిస్తున్నారు. ఈ సినిమా షూటింగ్ అంతా విదేశాల్లోనే జరుగుతోంది.
స్టార్ హీరోలు నటించిన చాలా సినిమాలు డాల్డీ ఎట్మాస్ సౌండ్‌తో రిలీజ్ అయినా ఆ సాంకేతికత కోసం తయారు చేసిన కథలు మాత్రం ఇంతవరకు మన దేశంలో రాలేదు. ఆలోటు భర్తీ చేస్తూ షూటింగ్ చేస్తున్నప్పుడే డాల్బీ ఎట్మాస్ సౌండ్‌ని దృష్టిలో పెట్టుకుని ఆర్పీ ఈ సినిమాను తెరకెక్కిస్తున్నారు.
ఓ పర్ఫెక్ట్ థ్రిల్లర్‌కు అత్యున్నత ప్రమాణాలు కలిగిన సౌండ్‌ ఎఫెక్ట్స్‌ తోడైతే అవుట్‌పుట్‌ ఏ స్థాయిలో ఉంటుందో ఈ సినిమాతో చూపించనున్నారు. ఇందులో తవ్లీన్, నదీమ్, నమన్, గోవింద్ సింగ్, గేహన సేథ్, సుశాంత్ ఠాకూర్, ఆమిర్, తాజ్ హవేద్, సల్మాన్, నితిన్, రూపాల్, ఐగిరిమ్, సైబ్జాన్, స్వరాజ్ విపిన్ నికం, ఇక్బాల్, శివమ్ జైస్వాల్, ఆశిష్ అన్షుమాన్ తదితరులు నటిస్తున్నారు. డాక్టర్‌ సోనాల్ ఈ మూవీని నిర్మిస్తున్నారు.
