దర్శకుడు పూరీ జగన్నాథ్ బాలీవుడ్ బాటలో పయనించనున్నట్లు తెలుస్తోంది. పూరీ జగన్నాథ్ గురువు, దర్శకుడు రామ్ గోపాల్ వర్మ తొలుత తెలుగులో సినిమాలు తీసి.. ఆ తర్వాత బాలీవుడ్‌లో పలు చిత్రాలు నిర్మించారు. ఇప్పుడు దర్శకుడు పూరీ జగన్నాథ్ కూడా హిందీవైపు అడుగులు వేయబోతున్నట్లు సమాచారం. ఇప్పటికే హిందీలో బిగ్‌బీ అమితాబ్ బచ్చన్‌తో దర్శకుడు పూరీ జగన్నాథ్ ‘బుడ్డా’ (హోగా తేరా బాప్) చిత్రాన్ని తీశారు. అయితే ఆ సినిమా పెద్దగా మెప్పించలేకపోయింది. దీంతో ఆ తర్వాత హిందీలో సినిమాలు చేయలేదు. తాజాగా తెలుగులో పూరీ జగన్నాథ్.. విజయ్ దేవరకొండతో ‘ఫైటర్’ మూవీ తీస్తున్నారు. ఈ సినిమాను హిందీలో కూడా రిలీజ్ చేయాలని భావిస్తున్నారు. బాలీవుడ్ నిర్మాత కరుణ్ జోహార్ ఈ సినిమాకు సహకారం అందిస్తున్నట్లు తెలుస్తోంది. ఈ సినిమా విడుదలైన తర్వాత హిందీలో వరుసగా సినిమాలు చేయాలని పూరీ జగన్నాథ్ నిర్ణయించుకున్నాడట. ఇందుకోసం ఆయన ముంబైకు షిఫ్ట్ అవుతారనే ప్రచారం జరుగుతోంది. మరి ఈ విషయంపై పూరీ జగన్నాథ్ ఏమంటారో చూడాలి.
