హైదరాబాద్ : విశ్వ విఖ్యాత నట సార్వభౌముడు ఎన్టీఆర్‌ జీవితం ఆధారంగా క్రిష్ ద‌ర్శ‌క‌త్వంలో తెరకెక్కిస్తున్న ‘ఎన్టీఆర్‌’ సినిమా ఫస్ట్‌లుక్ అదిరింది. నందమూరి బాలకృష్ణ కథానాయకుడుగా యన్‌బికె ఫిలింస్‌ పతాకంపై నిర్మిస్తున్న ఈ చిత్రాన్ని వారాహి చలన చిత్రం, విబ్రి మీడియా సమర్పిస్తున్నాయి. ప్రతిష్ఠాత్మకంగా నిర్మిస్తున్న చిత్రంలో బసవతారకం పాత్రలో విద్యాబాలన్‌, నారా చంద్రబాబు నాయుడు పాత్రలో ద‌గ్గుబాటి రానా నటిస్తున్నారు. సంక్రాంతికి ప్రేక్షకుల ముందుకు తెచ్చేందుకు సన్నాహాలు చేస్తున్నారు.
ఇదిలాఉండ‌గా స్వాతంత్య్ర దినోత్సవం సందర్భంగా సినిమా ఫస్ట్‌లుక్‌ను చిత్ర బృందం మంగ‌ళ‌వారం విడుదల చేసింది. బాలయ్య అచ్చం తన తండ్రి ఎన్టీఆర్‌లా కాషాయ రంగు దుస్తుల్లో కనిపించారు. ఎన్టీఆర్‌లాగానే మైక్‌ ముందు నిల్చుని మాట్లాడుతున్న‌ట్లు కనిపించారు. ఆయన వెనుక త్రివర్ణ ప‌తాకంతో ఉన్న ప్రచార చిత్రం ప్రస్తుతం సోషల్‌మీడియాలో అభిమానుల్ని ఆకట్టుకుంటోంది.
‘ఎన్టీఆర్‌’ సినిమాలో అగ్ర తారలు సైతం అతిథి పాత్రల్లో సందడి చేయనున్నారు. జూనియర్‌ ఎన్టీఆర్‌గా మోక్షజ్ఞ, నారా భువనేశ్వరిగా మంజిమా మోహన్‌, సావిత్రిగా కీర్తి సురేశ్‌, శ్రీదేవిగా రకుల్‌ప్రీత్‌ సింగ్‌, రామానాయుడుగా వెంకటేశ్‌, కృష్ణగా మహేశ్‌బాబు.. ఇలా అగ్ర‌శ్రేణి న‌టులు వివిధ పాత్రల్లో సందడి చేయనున్నట్లు తెలుస్తోంది. ఈ నేపథ్యంలో అభిమానుల్లో సినిమాపై మంచి ఆస‌క్తిపెరిగింది.
