ఒంగోలు : “ఆయన అక్షరం అవినీతి, అక్రమాలపై పాశుపతాస్త్రం. ఆయనొక అవిశ్రాంత అక్షర యోధుడు. ఆయన జీవనశైలి ని‌రాడంబర ముక్కు సూటితనం. ఆయన వాదం మానవతా వాదం. ఆయనే నిబద్దత గల సీనియర్ జర్నలిస్ట్, వామపక్ష వాది కావూరి వెంకట సుబ్బారావు.”
కావూరి ఈనాడు, ప్రజాశక్తి, మా టీవీ, 10టివిలలో విలువలు గల పాత్రికేయులుగా సుధీర్ఘ కాలంగా పనిచేశారు. తెలుగిల్లు డిజిటల్ మీడియా నడిపారు. వామపక్ష వాదిగా తను నమ్మిన సిద్ధాంతం కోసం తుది శ్వాస వరకు పోరాడారు. కరోనా మహమ్మారి 61ఏళ్ళ కావూరిని కాటేసింది. ఆదివారం ఉదయం ఆయన మరణించారు.
అక్షరాన్ని ఏనాడు అమ్ముకోని నిఖార్సైన మనిషి కావూరి. జిల్లాలో ఎందరో పాత్రికేయులను తయారు చేశారు. ఆయనకి చాలా మంది శిష్యులున్నారు. ఆయన ఎన్నో సామాజిక సంస్ధలలో కూడా పని చేసి సేవలందించారు. ఆయన మరణం తీరని లోటని, ఆయన భౌతికంగా మన మధ్య లేనప్పటికీ అక్షరాలలో, చేసిన సేవలలో మన మధ్యే ఉంటాడని పలువురు నేతలు అన్నారు. ఆయన సేవలు మరువలేనివని నివాళలర్పించారు. నివాళులు అర్పించిన వారిలో డాక్టర్ కొల్లా నాగేశ్వరరావు, డాక్టర్ చాపల వంశీకృష్ణ, సిపిఎం రాష్ట్ర నాయకులు వై సిద్దయ్య, కొల్లా మధు, శరత్ బాబు, సిపియం నాయకులు జివి కొండారెడ్డి, జి రమేష్, మారెళ్ళ సుబ్బారావు, ముసలరెడ్డి, రాష్ట్ర జర్నలిస్ట్ నాయకులు మీసాలు రామకృష్ణ, ఆంధ్రజ్యోతి జిల్లా స్టాఫ్ రిపోర్టర్ కె శ్రీనివాసరావు తదితరులు పాల్గొన్నారు.
