ప్రకాశం : రాష్ట్ర ముఖ్యమంత్రి వైఎస్ జగన్మోహన్ రెడ్డి ద్వారానే సంపూర్ణ మద్య నిషేధం సాధ్యమవుతుందని
రాష్ట్ర మద్య విమోచన ప్రచారం కమిటీ చైర్మన్ వి లక్ష్మణ్ రెడ్డి పేర్కొన్నారు. మా ఊరి అభివృద్ధి కమిటీ ఆధ్వర్యంలో ఈనెల 17న ఆదివారం వి లక్ష్మణ్ రెడ్డి జన్మభూమి అయిన కారుమంచిలో ఆత్మీయ అభినందన సభ ఘనంగా జరిగింది. సభలో కందుకూరు శాసనసభ సభ్యులు మానుగుంట మహీధర్రెడ్డి ప్రసంగిస్తూ రాష్ట్ర ఆర్థిక పరిస్థితి దయనీయంగా ఉన్నప్పటికీ రాష్ట్ర ముఖ్యమంత్రి దశలవారీగా మద్య నిషేధాన్ని ప్రకటించి అమలు చేయడం సాహసోపేతమైన చర్యగా కొనియాడారు. వి లక్ష్మణ్ రెడ్డిని రాష్ట్ర మద్య విమోచన కమిటీ చైర్మన్ గా నియమించడంపట్ల హర్షం వ్యక్తం చేశారు. వక్ఫ్ బోర్డ్ చైర్మన్ యడ్లపాటి రఘునాథబాబు ప్రసంగిస్తూ లక్ష్మణ్ రెడ్డి గత నాలుగు దశాబ్దాలుగా సామాజిక సేవలో నిమగ్నమై ఉన్నారని అన్నారు. దశలవారీగా మద్య నిషేధాన్ని ప్రకటించడం పట్ల మహిళాలోకం అభినందిస్తున్నారు. రాజకీయంగా సైద్ధాంతిక విభేదాలు ఉన్నప్పటికీ ముఖ్యమంత్రి చొరవ తీసుకుని మద్య నిషేధాన్ని జయప్రదంగా అమలుచేయడం స్వాగతిస్తున్నాం అన్నారు.
మద్య విమోచన ప్రచార కమిటీ చైర్మన్ వి లక్ష్మణ్ రెడ్డి ప్రసంగిస్తూ మద్య విమోచన ప్రచార కమిటీ చైర్మన్ గా బాధ్యతలు ఇచ్చినందుకు కృతజ్ఞతలు తెలిపారు. గత ఐదు నెలలుగా బెల్టుషాపులు సమూలంగా నిర్మూలించడానికి 20శాతం మద్యం షాపులు తగ్గించడం, ప్రభుత్వం పరిమితంగా ఉదయం 11 గంటల నుండి రాత్రి 8 గంటల వరకు మద్యం షాపులు నిర్వహించడం,13 జిల్లాల్లో జిల్లా స్థాయి ప్రభుత్వ ఆసుపత్రులలో డ్రగ్ డెడికేషన్ కేంద్రాలను ఏర్పాటు చేయాలని నిర్ణయించదాన్ని స్వాగతించారు. ముఖ్యమంత్రి రాజకీయ సంకల్పం అధికార సంకల్పానికి ప్రజా సంకల్పంకి తోడు కావడం మంచి పరిణామన్నారు. జన్మభూమి కారుమంచి నుంచి ఆదర్శ గ్రామంగా తీర్చిదిద్దడానికి కృషి చేస్తానని ఉన్నారు. మద్యం కల్తీ, మద్యం నాటుసారా, గంజాయి ఇలాంటి వాటిని పూర్తిగా తొలగించడానికి రాజకీయ జోక్యం లేకుండా పని చేస్తానన్నారు. ఆత్మీయ అభినందన సభలో ఎక్సైజ్ సూపరింటెండెంట్ నాగేశ్వరరావు, జిల్లా అటవీశాఖ అధికారి భాష, జన విజ్ఞాన వేదిక జాతీయ కార్యదర్శి నాగేశ్వరరావు, చైతన్య వేదిక రాష్ట్ర ఉపాధ్యక్షులు డాక్టర్ విజయ సారథి, ప్రధాన కార్యదర్శి అలీ మాలిక, కారుమంచి గ్రామ మాజీ సర్పంచ్ సత్యనారాయణరెడ్డి, మధ్య వ్యతిరేక ఉద్యమ నాయకులు కె అరుణ, ఎస్పి జి చక్రపాణి, ప్రముఖ విద్యావేత్త అన్నా మాస్టరు, రిటైర్డ్ ఎక్సైజ్ జాయింట్ కమిషనర్ జి జోసఫ్ పాల్గొని లక్ష్మణ్ రెడ్డిని ఘనంగా సత్కరించారు. ఈ సందర్భంగా ఆరువేల మొక్కలు నాటే కార్యక్రమంను ఎమ్మెల్యే మానుగుంట మహీధర్ రెడ్డి మొక్కలు నాటి ప్రారంభించారు. పూనం రామ్ కోటిరెడ్డి, యశోదమ్మలు ట్రాక్టర్లు, ట్యాంకర్ ని మా ఊరి అభివృద్ధికి కమిటీని బహుకరించారు. ఈ సందర్భంగా ఆనం యువత ఫోర్స్ కారుమంచి నాయకత్వంలో భారీ బైక్ ర్యాలీ నిర్వహించారు.
