హెల్త్ డెస్క్ : సంపూర్ణ ఆరోగ్యానికి జీర్ణవ్యవస్థ, కాలేయం పనితీరు అత్యంత కీలకం. పేగును ‘రెండో మెదడు’ అని కూడా అంటారు. ఇది పోషకాలను గ్రహించడం, రోగనిరోధక శక్తిని పెంచడంలో సహాయపడుతుంది. కాలేయం శరీరాన్ని డిటాక్స్ చేయడంలో ప్రధాన పాత్ర పోషిస్తుంది. ఈ రెండింటి ఆరోగ్యాన్ని కాపాడుకోవడం చాలా ముఖ్యం. కాలిఫోర్నియాకు చెందిన హార్వర్డ్, స్టాన్‌ఫోర్డ్ విశ్వవిద్యాలయాల్లో శిక్షణ పొందిన గ్యాస్ట్రో ఎంటరాలజిస్ట్ డాక్టర్ సౌరభ్ సేథి, పేగు, కాలేయ ఆరోగ్యాన్ని మెరుగుపరచడానికి తాను రోజూ తీసుకునే మూడు ముఖ్యమైన పానీయాలను సూచించారు.
ఆరోగ్యకరమైన జీర్ణవ్యవస్థ అనేక దీర్ఘకాలిక వ్యాధుల ప్రమాదాన్ని తగ్గిస్తుంది. డాక్టర్ సేథి ప్రకారం ఈ మూడు పానీయాలు రోజూ తీసుకోవడం వల్ల జీర్ణక్రియ మెరుగు పడుతుంది. కాలేయ పనితీరుకు మద్దతు లభిస్తుంది. గట్ మైక్రోబయోమ్ ఆరోగ్యంగా ఉంటుంది.
డాక్టర్ సేథి సూచించిన మూడు పానీయాలు:
1. గ్రీన్ టీ : ఇందులో కాటెచిన్స్ వంటి శక్తి వంతమైన యాంటీ ఆక్సిడెంట్లు పుష్కలంగా ఉంటాయి. ఇవి శరీరంలో వాపును తగ్గించి, కణాలను ఆక్సీకరణ ఒత్తిడి నుండి రక్షిస్తాయి. ఇది పేగు, కాలేయానికి మేలు చేస్తుంది. గుండెల్లో మంట, ఉబ్బరం వంటి జీర్ణ సమస్యలను తగ్గిస్తుంది.
2. కాఫీ (చక్కెర లేకుండా) : ఉదయాన్నే చక్కెర లేని కాఫీ తాగడం కాలేయానికి ఎంతో మేలు చేస్తుందని డాక్టర్ సేథి తెలిపారు. కాఫీలోని యాంటీ ఆక్సిడెంట్లు కాలేయ వ్యాధుల తీవ్రతను తగ్గించడంలో, ఫ్యాటీ లివర్, లివర్ క్యాన్సర్ ప్రమాదాన్ని నివారించడంలో సహాయ పడతాయి. గుండెల్లో మంట సమస్య ఉన్నవారు డీ కాఫిన్ కాఫీని ఎంచుకోవచ్చు.
3. స్మూతీలు (కొబ్బరి నీళ్లతో) : పండ్లు, కూరగాయలను కొబ్బరి నీళ్లతో కలిపి తయారు చేసిన స్మూతీలు ఫైబర్‌తో నిండి ఉంటాయి. ఇది జీర్ణక్రియకు, పేగు ఆరోగ్యానికి చాలా అవసరం. కొబ్బరి నీళ్లు శరీరాన్ని హైడ్రేట్‌గా ఉంచి, సహజ ఎలక్ట్రోలైట్‌లను అందిస్తాయి. స్మూతీని మరింత పోషకభరితంగా మారుస్తాయి.
ఈ సులభమైన, ఆరోగ్యకరమైన పానీయాలను మీ రోజువారీ దినచర్యలో చేర్చుకోవడం ద్వారా పేగు, కాలేయ ఆరోగ్యాన్ని కాపాడుకోవచ్చని డాక్టర్ సేథి సలహా ఇస్తున్నారు.
గమనిక : ఈ సమాచారం ఇంటర్ నెట్లో దొరికిన సమాచారం ఆదారంగా ఇవ్వబడినది. ఇది వైద్య చికిత్స కాదు. పేగు, లివర్ సమస్యలు ఉన్నవారు మీ ఫ్యామిలీ డాక్టర్ ను సంప్రదించడం ఉత్తమం.
