ప్రకాశం : పోలీస్ కస్టడీలో ఉండగా లారీ కింద పడి మృతి చెందిన సింగరాయకొండ మండలం కనుమల్లకు చెందిన నిరుపేద గిరిజన యువకుడు పేరం వెంకట్రావు కుటుంబాన్ని పిడిసిసి బ్యాంక్ చైర్మన్, వైసీపీ కొండపి ఇంచార్జ్ డాక్టర్ మాదాసి వెంకయ్య శుక్రవారం కలెక్టర్ పోలా భాస్కర్ వద్దకు తీసుకువెళ్లారు. ఈ సందర్భంగా మృతుడు వెంకట్రావు కుటుంబ నేపథ్యం గురించి, వయసు పైబడిన తల్లిదండ్రులు, మూగ సోదరి, పది చదివే సోదరుడు, ఇల్లు కూడా సరిగా లేని వాళ్ళ దయనీయ దుస్థితి గురించి డాక్టర్ వెంకయ్య కలెక్టర్ కి వివరించారు. బాధిత కుటుంబానికి ప్రభుత్వ పరంగా రూ.10లక్షల ఎక్సగ్రేషియాతోపాటు ఒకరికి ప్రభుత్వ ఉద్యోగం, ఇండ్ల స్థలం, పక్కా గృహం మంజూరు చేయాలని కలెక్టర్ కు వినతి పత్రం అందజేశారు.
ఈ సందర్భంగా కలెక్టర్ పోలా భాస్కర్ మాట్లాడుతూ ప్రతిపాదనలను ప్రభుత్వానికి పంపిస్తానని, ప్రభుత్వం నుండి రావలసిన అన్ని అవకాశాలను ఆ కుటుంబానికి లబ్ధిచేకూరేలా చేస్తానని హామీ ఇచ్చినట్లు వెంకయ్య తెలిపారు. బాధిత కుటుంబానికి అన్ని విధాలుగా అండగా ఉంటామని, పది లక్షల ఎక్స్ గ్రేషియాతో పాటు మూగ సోదరికి ప్రభుత్వ ఉద్యోగం, ఇండ్లస్థలం, పక్కా ఇల్లు వచ్చేలా అవసరమైతే ముఖ్యమంత్రి జగన్మోహన్ రెడ్డితో మాట్లాడతానని, ముఖ్యమంత్రి దళితులు, గిరిజనుల పక్షపాతి అని వెంకయ్య పేర్కొన్నారు.
