హైదరాబాద్ : టాలీవుడ్ నిర్మాతల్లో ‘దిల్’ రాజు ట్రాక్ రికార్డే వేరు. దాదాపు అగ్ర నాయకులందరితో సినిమాలను నిర్మించడమే కాదు… పలు ఘనవిజయాలు కూడా అందుకున్నారు. ఇక మెగా కాంపౌండ్ హీరోలకైతే కలిసొచ్చిన నిర్మాతగా రాజుకి ప్రత్యేక గుర్తింపు ఉంది. రామ్ చరణ్, అల్లు అర్జున్, సాయి తేజ్, వరుణ్ తేజ్ ఇలా మెగా హీరోలతో ‘దిల్’ రాజు నిర్మించిన సినిమాలు మంచి విజయం అందుకున్నాయి.
అయితే ఇప్పుడు ఓ ఆసక్తికర వార్త హల్ చల్ చేస్తోంది. ‘దిల్’ రాజు… త్వరలో మెగాస్టార్ చిరంజీవితో ఓ సినిమా చేయబోతున్నట్లు టాక్ వినిపిస్తోంది. ఇప్పటికే ఇద్దరి మధ్య చర్చలు జరిగాయని… మంచి కథ దొరికితే రాజు సంస్థలో చిరు సినిమా చేసేందుకు గ్రీన్ సిగ్నల్ ఇచ్చారని తెలుస్తోంది. కొరటాల శివ మూవీ తరువాత చిరు నటించబోయే సినిమా ఇదేనని వినికిడి. మరి… వీరి కాంబో ఎలాంటి హిట్ కొట్టబోతోందో చూడాలి.
