చీరాల (Crirala) : ఆర్టీసీలో అక్రమ సస్పెన్షన్లు రద్దు చేయాలని కోరుతూ ఎస్‌డబ్ల్యూఎఫ్ రాష్ట్ర కమిటీ పిలుపు మేరకు స్థానిక ఆర్టీసీ బస్టాండ్ వద్ద కార్మికులు మంగళవారం ధర్నా నిర్వహించారు. ధర్నాను ఉద్దేశించి ఆర్టీసీ ఎస్డబ్ల్యుఎఫ్ డిపో కార్యదర్శి బి శ్రీనివాసరావు మాట్లాడారు. ఏలూరు ఆర్టీసీ అవుట్లెట్ పెట్రోలు బంక్ కుంభకోణంపై జ్యూడిషియల్ విచారణ జరిపించాలని కోరారు. ఏలూరు పెట్రోల్ బంకు 2021లో ప్రారంభమైనప్పటి నుండి ఇప్పటివరకు రూ.83 లక్షలు అవినీతి జరిగినట్లు ఆరోపణలు ఉన్నాయని అన్నారు. ఈ ఆరోపణలపై జ్యుడీషియల్ విచారణ చేసి కారకులైన వ్యక్తులను శిక్షించాలని కోరారు.
ఏలూరు డిపో మేనేజర్ బి వాణి, శ్రీకాకుళం ఆర్టీసీ డిఎం టిఆర్ఎస్ శర్మ, ఏలూరు అకౌంట్ ఆఫీసర్ బిఎస్ మూర్తి, పల్నాడు ఎకౌంట్స్ ఆఫీసర్ ఎంవి రావు, ఏలూరు డిపో అసిస్టెంట్ మేనేజర్ జిఎల్‌పివి సుబ్బారావు, ఏలూరు డిపో డిప్యూటీ సూపర్డెంట్ కె నాగేశ్వరి, ఏలూరు డిపో జూనియర్ అసిస్టెంట్ ఎం శ్రీధర్, ఎస్ రంగనాథ్ ఏ సంబంధమూ లేకుంటే రూ.50 లక్షలు రికవరీ ఎందుకు చెల్లించారని ప్రశ్నించారు. మిగిలిన రూ.30 లక్షలు ఎందుకు రికవరీ చేయలేదని అన్నారు. ఈ అవినీతిలో ఎటువంటి సంబంధం లేని నలుగురు ఉద్యోగులపై నెట్టే ప్రయత్నం చేశారని అన్నారు. సంబంధం లేని ఎస్డబ్ల్యుఎఫ్ రాష్ట్ర అధ్యక్షులు సిహెచ్ సుందరయ్యను అక్రమంగా సస్పెండ్ చేశారని అన్నారు. కెఎంపిఎల్ పేరుతో డ్రైవర్లపై వేధింపులు మానుకోవాలని హెచ్చరించారు.
చీరాల డిపోలో గతంలో స్టాల్స్ రెంట్‌ వసూళ్ల విషయంలో జరిగినా అవినీతిలో విచారణ ఆధారంగా క్లర్క్ డేవిడ్‌ను రిమూవ్ చేసినటువంటి అధికారులు ఏ సంబంధం లేని ఎస్‌డబ్ల్యూఎఫ్ డిపో కార్యదర్శి శ్రీనివాసరావుకు చార్జిషీటు మెమో ఇచ్చి ఇంక్రిమెంట్లు ఎందుకు కట్ చేశారని సిఐటియు నాయకులు ప్రశ్నించారు. అవినీతికి కారణమైన సూపర్నెంటుపై చర్యలు ఎందుకు తీసుకోలేదని అన్నారు. అవినీతికి పాల్పడిన వారిపై చర్య తీసుకోవడంలోనూ వివక్ష పాటిస్తున్నారని ఆరోపించారు. కార్యక్రమంలో సిఐటియు నాయకులు ఎన్ బాబురావు, ఎం వసంతరావు, పి కొండయ్య, ఎస్డబ్ల్యుఎఫ్ నాయకులు కెబికె రెడ్డి, భాష, వెంకటేశ్వర్లు, రామ్మోహన్రావు, జయరావు, పంచాయతీ కార్మిక సంఘం నాయకులు పోతురాజు, ఐఎల్‌టిడి ఫెడరేషన్ నాయకులు పి కాలేశా, నీలాంబరం, జెవివి నాయకులు డి నారపరెడ్డి పాల్గొన్నారు.
