Chinni Serial (April 16th Episode): పాపం చిన్ని.. అమ్మనాన్నలు పక్కనే ఉన్నా.. నోరారా అమ్మా అని పిలవలేదు.. నాన్నా అని చెప్పలేదు.
ప్రాణాలకు తెగించి కావేరిని బాలరాజు కాపాడితే.. తనని కోనేటిలోకి బాలరాజే తోసి ఉంటాడని నోటికొచ్చినట్టు మాట్లాడి అతనిపై కావేరి నిందలు వేస్తుంది. ఇది నిన్నటి ఎపిసోడ్‌లోని ముచ్చట. ఈరోజు (ఏప్రిల్ 16) ఎపిసోడ్‌లో ఏమైందంటే.. బాలరాజు చిన్నిని ఆటోలో స్కూలు తీసుకెళ్లేందుకు రెడీ అవుతాడు. అది ఇష్టంలేని కావేరి చిన్నిని తనతో స్కూటీపై తీసుకెళతానని అంటుంది. ఎందుకని బాలరాజు ప్రశ్నిస్తాడు. అప్పుడు ఆటో తాళాలను తప్పల్లోకి విసిరేసి.. ఆ తాళాలు వెతుక్కుని తీసుకొచ్చేందుకు ఆలస్యం అవుతుంది కాబట్టి అంటూ… చిన్నిని తనతో పాటు తీసుకుని వెళ్లిపోతుంది కావేరి. ఆ తరువాత తాళం వెతుక్కుని చందుని ఇంటికి తీసుకుని వెళ్తాడు బాలరాజు. ఇక దేవా కొడుకు మహి.. స్కూల్‌కి వెళ్లనని మారాం చేస్తాడు. ఎందుకు వెళ్లవని దేవా అడగడంతో.. ‘నాకు స్కూల్‌లో అవార్డ్ వచ్చింది. ఆ అవార్డ్ తీసుకోవడానికి పేరెంట్స్‌తో పాటు అంతా వస్తారు. కానీ మీరు బిజీ కదా. అందుకే వెళ్లను’ అని అంటాడు మహి. ‘నేను ఎంత బిజీగా ఉన్నా నీకంటే ఎక్కువ కాదు నాన్నా. స్కూల్‌కి వస్తాను’ అని కొడుకుని ముద్దాడతాడు దేవా. ఇంతలో నాగవల్లి వచ్చి.. మన శత్రువు గురించి ఏం ఆలోచించావ్ బావా? అని అడుగుతుంది. అది కావేరి అయినా కావేరి కాకపోయినా.. దాన్ని చూసిన ప్రతిసారీ మీ అక్క గుర్తొస్తుంది. అది చేసిన ద్రోహం గుర్తొస్తుంది. మనల్ని ఇంతగా బాధపెట్టిన దాన్ని అంత సింపుల్‌గా చంపేస్తే ఎలా?
త్వరలో కావేరి పెళ్లి.. పేపర్‌లో ఫొటో
అది కుక్క చావు చచ్చేట్టు చేస్తా. అలా చేయాలంటే ముందు మనం సత్యం బాబు ఫ్యామిలీని ట్రాప్ చేయాలి. ఆ ఫ్యామిలీని చెరోపక్క నుంచి నరుక్కురావాలి’ అంటూ నాగవల్లికి ప్లాన్ మొత్తం చెప్తాడు దేవా. అది విన్న నాగవల్లి సూపర్ బావా.. సూపర్ అని బావతో చేతులు కలిపేస్తుంది. ఇక ఉష (కావేరి) స్కూల్‌కి వెళ్లడంతో కంగ్రాట్స్ అంటూ టీచర్లు పలకరిస్తారు. కంగ్రాట్స్ ఎందుకు? అని ఉష అడగడంతో.. ఎందుకు ఏంటీ.. తొందరలోనే మీరు పెళ్లి చేసుకోబోతున్నారు కదా అని అంటుంది మరో టీచర్.
మీకు కాబోయే వాడు ఇతనే కదా.. ఇదిగో ఫొటో
ఏం మాట్లాడుతున్నారు మీరు.? నేను పెళ్లి చేసుకోవడం ఏంటి? మీకు ఎవరు చెప్పారు? అని అడుగుతుంది ఉష. ఎవరో చెప్పడం ఏంటి? మీరు మీకు కాబోయే వారు కలిసి దిగిన ఫొటోలు చూశాం అని సాక్షి పేపర్‌లో పడిన ఫొటోని ఉషకి చూపిస్తుంది టీచర్. గుడిలో కావేరి, బాలరాజు సీతారాముల కళ్యాణం చేసిన ఫొటో అది. ఆ ఫొటోని చూసి షాక్ అవుతుంది. మీకు పెళ్లి ఫిక్స్ అయ్యింది కాబట్టి కాబోయే వాడితో కలిసి సీతారాముల కళ్యాణం చేశారు అంతే కదా’ అని అంటుంది స్కూల్ టీచర్. దాంతో ఉష.. ‘అంత సీన్‌లేదు. గుడిలో డ్రా తీస్తే మా ఇద్దరి పేర్లు వచ్చాయి. అందుకే ఇద్దరం కలిసి కళ్యాణం చేశాం’ అని కోపంగా సమాధానం ఇస్తుంది.
నాన్నా… ఆగు నాన్నా..
ఇక చిన్నికి కూడా స్కూల్‌లో అవార్డ్ రావడంతో.. మీ పేరెంట్స్‌ని తీసుకుని వచ్చే అదృష్టం లేకుండా పోయింది. ఇంతకీ నీ తరుపున ఎవరు వస్తారు? అని అడుగుతుంది టీచర్. ఈ రోజు మా మామయ్యకి ముఖ్యమైన పని ఉంది టీచర్. అందుకే ఆయన్ని ఇబ్బంది పెట్టడం ఇష్టం లేక చెప్పలేదు’ అని అంటుంది. అనంతరం చిన్ని బాలరాజు దగ్గరకు పరుగుతీస్తుంది. అప్పటికి బాలరాజు ఆటోలో వెళ్లిపోతుండటంతో.. వెనుకే పరుగుతీస్తుంది చిన్ని. అద్దంలో చూసిన బాలరాజు.. కంగారుగా ఆటో ఆపి కూతురు దగ్గరకు పరుగుతీస్తాడు. ఏమైంది చిన్నీ.. ఎందుకు కంగారుపడుతున్నావ్ అని అడుగుతాడు బాలరాజు.
నువ్వే మా నాన్నవని స్కూల్‌లో చెప్పేస్తా పద నాన్నా..
నాకు అవార్డ్ వచ్చింది నాన్నా.. కూతురు అవార్డ్ తీసుకుంటున్నప్పుడు నాన్న పక్కన ఉండాలి కదా.. పద నాన్నా అని అంటుంది చిన్ని. దాంతో బాలరాజు.. ‘అంటే నేనే మీ నాన్న అని స్కూల్‌లో చెప్పేస్తావా? అని అడుగుతాడు. అవును నాన్నా.. చెప్తాను. పదండి అని అంటుంది చిన్ని. దాంతో బాలరాజు.. ‘వద్దు చిన్నీ.. వద్దు.. ఈ విషయం ఎవరికీ తెలియకూడదు. నేను మీ నాన్నని తెలిస్తే ప్రమాదంలో పడతాం’ అని అంటాడు. ‘అబ్బా అలా ఏం కాదు నాన్నా పదా.. నేను నీ మాట వినను.. ఈ రోజు నువ్వే మా నాన్నవి అని అందరికీ చెప్పేస్తా.. పద నాన్నా’ అని చేయిపట్టుకుని లాక్కుని వెళ్తుంటుంది చిన్ని.
అమ్మ నాన్నా పక్కనున్నా.. నేను అనాధనని అర్థమైంది నాన్నా..
అమ్మ పక్కనే ఉన్నా తనే మా అమ్మ అని చెప్పుకోలేను. నాన్న ఎదురుగా ఉన్నా చెప్పకోవద్దంటావా? అమ్మ అయితే పేరు మార్చుకుని బతుకుతుంది. ఆ విషయం బయటకు చెప్తే అమ్మ దూరం అవుతుంది. కానీ నువ్వు బాలరాజుగానే ఉన్నావ్ కదా. ఎందుకు చెప్పకూడదు. నా నాన్న ఆటోడ్రైవర్ అని చెప్పుకోవడానికి ఫీల్ అవుతానని అనుకుంటున్నావా? నువ్వు నా పక్కన ఉంటే చాలు నాన్నా’ అని అడుగుతుంది చిన్ని. దాంతో బాలరాజు.. ‘నీకు చెప్పినా అర్థం కాదు చిన్నీ. పరిస్థితిని అర్థం చేసుకోకుండా విసిగించకు’ అని అంటాడు బాలరాజు. అర్థమైంది నాన్నా. అర్థమైంది. అమ్మ నాన్నా పక్కనున్నా నేను అనాధనని అర్థమైంది’ అని చిన్ని ఏడుస్తూ బాలరాజుని కూడా ఏడిపించేస్తుంది.
పద చిన్నీ.. మీ నాన్నగా స్కూల్‌కి వస్తా.. నీ పక్కన నిలబడతా
అమ్మని అమ్మా అని పిలవలేను. నాన్నని నాన్నా అని పిలవలేని దురదృష్టవంతురాలినని అర్థమైంది నాన్నా అంటూ చిన్ని కన్నీళ్లు పెట్టుకునే సీన్ చూస్తే మనకి కళ్లలో నీళ్లు తిరుగుతాయి. కూతురు మాటలకి తీవ్ర భావోద్వేగానికి గురైన బాలరాజు.. ‘చిన్నిని గుండెలకు హత్తుకుని. కన్నీళ్లు పెట్టుకుంటాడు. నువ్వు దురదృష్టవంతురాలివి కాదు చిన్నీ అదృష్టవంతురాలివి. నా కూతురు ఎప్పటికీ అదృష్టవంతురాలివే. పద చిన్నీ నేను వస్తాను’ అని అంటాడు బాలరాజు. మీ నాన్నగా నీతో పాటు స్కూల్‌కి వస్తాను అని అంటాడు బాలరాజు. వద్దులే నాన్నా.. ఏదో ప్రాబ్లమ్ వస్తుందని అన్నావ్ కదా వద్దులే అని అంటుంది చిన్ని.
సత్యంబాబుని బుట్టలో పడేసిన దేవా..
ఎప్పుడో వచ్చే ప్రాబ్లమ్ కన్నా ఇప్పుడు నువ్వు సంతోషంగా ఉండటమే నాకు ముఖ్యం చిన్నీ. ఎన్ని ప్రమాదాలు ధైర్యంగా ఎదుర్కొంటా. పదా వెళ్దాం అని కూతురు చేయి పట్టుకుని స్కూల్‌లోకి తీసుకుని వెళ్తాడు బాలరాజు. మరోవైపు కావేరి కూడా చిన్ని అవార్డ్‌లో జాయిన్ కాబోతుంది. మరోవైపు దేవా.. సత్యంబాబుని బుట్టలో వేసుకునే పథకం రచించాడు. అతని షాప్‌కి వెళ్లి మెల్లగా మాటలు కలిపి.. ఆ సీతారాముల దయతో మనం ఫ్రెండ్స్ అయ్యాం.. మా కంపెనీలో ఉద్యోగులకు యూనిఫామ్‌లు కుట్టాలి.. అవి మీ చేతుల మీదుగా చేయాలి అని అడుగుతాడు దేవా. ఆ మాటతో సంతోషపడిపోయిన సత్యం.. అంత పెద్ద ఆర్డర్ ఇస్తున్నారు థాంక్స్ అని అంటాడు.
సత్యంతో చేతులు కలిపి ఉష గురించి కూపీ లాగాడు కానీ..
థాంక్స్ చెప్పాల్సింది నాకు కాదు.. ఆ సీతారాములకి.. ఆ కళ్యాణం వల్లే కదా మనం ఫ్రెండ్స్ అయ్యాం అని సత్యంబాబుని బుట్టలో పడేస్తాడు దేవా. సత్యంబాబుని మాటల్లో పెట్టి ఉష టీచర్ గురించి అడుగుతాడు దేవా. ఆ అలాంటి కూతురు ఉండాలన్నా.. అలాంటి చెల్లెలు ఉండాలన్నా అదృష్టం ఉండాలని సత్యం బాబు ఎమోషనల్ అయిపోవడం చూసిన దేవా.. వీడు ఇంత ఎమోషనల్ అయిపోతున్నాడంటే ఆమె ఖచ్చితంగా కావేరినే అయ్యి ఉంటుందని ఫిక్స్ అయిపోతాడు. అయితే సత్యంబాబు తెలివిగా.. ఉషని కన్న తల్లిదండ్రులు చాలా అదృష్టవంతులు.. వాళ్లు డెహ్రాడూన్‌లో ఉంటారని అంటాడు. ఇక రేపటి ఎపిసోడ్‌లో చిన్ని కోరుకున్నట్టుగానే తన తల్లిదండ్రులతో కలిసి అవార్డ్ అందుకోబోతుంది.
