భట్టిప్రోలు (Battiprolu) : అమరావతి బుద్ధిష్ట్ డెవలప్మెంట్ సర్క్యూట్లో భట్టిప్రోలు పేరు చేర్చేందుకు జిల్లా యంత్రాంగం, పర్యటక శాఖ రాష్ట్ర అధికారులకు నివేదిక పంపించాలని ఆంధ్ర నవ బుద్దిస్ట్ సొసైటీ కార్యదర్శి, న్యాయవాది దోవ రమేష్ రాంజీ కోరారు. ప్రజా సమస్యల పరిష్కార వేదికలో కలెక్టర్ డాక్టర్ బి వినోద్ కుమార్‌కు సోమవారం వినతి పత్రం అందజేశారు.
ఇటీవల రాష్ట్ర ప్రభుత్వం 2024 – 29 పర్యాటక పాలసీలో రాష్ట్ర వ్యాప్తంగా బౌద్ధ క్షేత్రాలను పర్యాటకంగా అభివృద్ధి చేసేందుకు అమరావతి, విశాఖపట్నం కేంద్రాలుగా బుద్ధిస్ట్ సర్క్యూట్స్ అభివృద్ధి, వాటికి ప్రాచుర్యం కల్పించేందుకు కమిటీలను నియమిస్తూ పర్యాటక శాఖ చీఫ్ సెక్రటరీ అజయ్ జైన్ జారీ చేసిన ఉత్తర్వుల్లో భట్టిప్రోలు పేరు విస్మరించారని వినతి పత్రంలో పేర్కొన్నారు. అమరావతి సర్క్యూట్లో ఉమ్మడి గుంటూరు జిల్లాలోని అమరావతి, గుంటుపల్లి, ఉండవల్లి, నాగార్జున కొండ, కృష్ణా జిల్లా పరిధిలోని ఘంటశాలను పర్యాటక అభివృద్ధి ప్రదేశాలుగా పేర్కొన్నారని తెలిపారు.
అమరావతి (Amaravathi), నాగార్జున కొండ బౌద్ధ క్షేత్రాల కన్నా పురాతనమైన భట్టిప్రోలు బౌద్ధ క్షేత్రాన్ని చేర్చకపోవడం విచారకరమని అన్నారు. రాష్ట్ర పర్యాటక అధికారుల వైఖరిపై స్థానిక అధికారుల ద్వారా జిల్లా పర్యాటక అధికారి దృష్టికి తీసుకు వెళ్లినప్పటికీ స్పందన లేదని ధ్వజమెత్తారు. ఇప్పటికైనా కలెక్టర్ సత్వరమే స్పందించి భట్టిప్రోలు బౌద్ధ క్షేత్రాన్ని పర్యాటక ప్రాంతంగా అభివృద్ధి చేసేందుకు తగిన నివేదికలు అందజేయాలని కోరారు. కార్యక్రమంలో అఖిలభారత బహుజన సంక్షేమ సంఘం జిల్లా అధ్యక్షులు డాక్టర్ పర్రె కోటయ్య పాల్గొన్నారు.
