వెబ్‌డెస్క్‌ : ఎపి ప్రభుత్వం వినూత్న ఆలోచన చేసింది. అసెంబ్లీ సమావేశాలపై విద్యార్ధులకు అవగాహన కల్పించాలని నిర్ణయించింది. అసెంబ్లీతోపాటు మండలిలో ఏం జరుగుతుందనేది తెలియజేందుకు ఏర్పాట్లు చేసింది. ఈ మేరకు రాజ్యాంగ ఆమోద దినోత్సవం నవంబర్‌ 26న మాక్‌ అసెంబ్లీ సమావేశాలు నిర్వహించనున్నారు. రాజ్యాంగం ఆమోదం పొంది 76ఏళ్లు అయిన సందర్భంగా విద్యార్ధులతో ఈ సమావేశాలు ఏర్పాటు చేశారు. ఆ రోజు ఉదయం 9గంటలకు సమావేశాలు ప్రారంభం అవుతాయి. 175నియోజకవర్గాల నుండి విద్యార్ధి ప్రతినిధులను ఈ పాటికే వివిద రకాల పోటీలు నిర్వహించి ఎంపిక చేశారు. ఎంపికైన విద్యార్ధులు ఆయా నియోజకవర్గ ప్రతినిధులుగా పాల్గొంటారు. తొలుత ప్రోటెం స్పీకర్‌ అసెంబ్లీ సమావేశాలను ప్రారంభిస్తారు. ఆ తర్వాత స్పీకర్‌, డిప్యూటి స్పీకర్‌ ఎన్నిక జరుగుతుంది. ఈ కార్యక్రమంలో ప్రతి నియోజకవర్గం నుండి ఎంఎల్‌ఎలుగా ఎంపికైన విద్యార్ధులు పాల్గొంటారు. వారిలో అధికార పక్షం, ప్రతిపక్షంగా ఉంటారు. ముఖ్యమంత్రి, ప్రతిపక్ష నేతగా ఇద్దరు విద్యార్ధులు వ్యవహరిస్తారు. అసెంబ్లీ సమావేశాలు ప్రారంభం కాగానే ప్రశ్నోత్తరాలు జరుగుతాయి. జీరో అవర్‌ తర్వాత బిల్లుపై చర్చిస్తారు. వీటితో పలు అంశాలపై విద్యార్ధులు చర్చిస్తారు. సుమారు 3గంటలపాటు అసెంబ్లీ సమావేశాలు జరుగనున్నాయి. ఈ సమావేశాలను సిఎం చంద్రబాబు సహా మంత్రులు అందరూ వీక్షిస్తారు. అలాగే అసెంబ్లీ సమావేశాలు ప్రత్యక్ష ప్రసారం చేసేందుకు ఏర్పాట్లు చేశారు.
