హైదరాబాద్ : మలయాళీ భామ, ఇంటర్నెట్‌ సెన్సేషన్‌ ప్రియా వారియర్‌కు టాలీఉడ్ స్టార్ హీరో అల్లు అర్జున్ ఫిదా అయ్యారు. ఆమె నటిస్తున్న ‘ఒరు అదార్‌ లవ్‌’ చిత్రంలోని ‘మాణిక్య మలరాయ’ అనే పాటలో ఆమె కళ్లతో పలికించిన హావభావాలు యువత హృద‌యాల‌ను ఎంత‌గా హ‌త్తుకుందో సోష‌ల్ మీడియా వైర‌ల్ చూస్తేనే తెలుస్తుంది. ఈ పాట విడుదలైనప్పటి నుండి ఇంటర్నెట్‌లో హాట్‌టాపిక్‌గా మారింది. ఫేస్‌బుక్‌, ట్విటర్‌, ఇన్‌స్టాగ్రామ్ ఇలా ఏ మాధ్యమంలో చూసిన ఆమే హావ‌బావాలే క‌నువిందు చేస్తున్నాయి. ఈ పాటపై అనేక పేరడీలు యూట్యూబ్‌లో ట్రెండింగ్‌లో ఉన్నాయి.
ఆ పాట చూసిన అల్లు అర్జున్ కొన్ని రోజుల క్రితం ట్విటర్‌ వేదికగా స్పందించారు. ‘ఈ మధ్య కాలంలో నేను చూసిన క్యూట్‌ వీడియోల్లో ఇదొకటి. సహజత్వంలో ఉన్న పవర్‌ ఇది. చాలా నచ్చింది’ అని పేర్కొన్నారు.
తాజాగా ఆయన ఈ పాటకు పేరడీలో నటించారు. తన కుమారుడు అయాన్‌తో కలిసి ఈ పేరడీ చేయడం విశేషం. ప్రియా వారియర్‌లా అల్లు అర్జున్ మారారు. అల్లు తన రెండు వేళ్లకు ముద్దుపెట్టి తన కుమారుడిపై గురిపెట్టారు. అప్పటి వరకు ముద్దు ముద్దుగా తండ్రిని అనుసరించడానికి ప్రయత్నించిన కుమారుడు అయాన్‌ గురిపెట్టిన వెంటనే బల్లపై నుండి బెడ్‌పైకి కేక వేస్తూ దూకాడు. ఇంత క్యూట్‌గా ఉన్న ఈ వీడియోను బన్నీ సతీమణి స్నేహారెడ్డి ఇన్‌స్టా్గ్రామ్‌లో పోస్ట్‌ చేశారు.‘ఒరు అదార్‌ లవ్‌’ అనే హ్యాష్‌ట్యాగ్‌ను ఆ వీడియో క్లిప్‌కు జత చేశారు. ఈ వీడియో ప్రస్తుతం సోషల్‌మీడియాలో అల్లు అభిమానుల్ని ఆకట్టుకుంటోంది. ‘చాలా బాగుంది, సో క్యూట్‌, అద్భుతంగా ఉంది..’ అంటూ అభిమానులు కామెంట్స్‌ చేస్తున్నారు.
బన్నీ ప్రస్తుతం ‘నా పేరు సూర్య నా ఇల్లు ఇండియా’ సినిమా చిత్రీకరణలో ఉన్నారు. వక్కంతం వంశీ దర్శకత్వం వహిస్తున్న ఈ చిత్రంలో అను ఇమ్మాన్యుయేల్‌ కథానాయికగా నటిస్తున్నారు. మే 4న ఈ సినిమాను ప్రేక్షకుల ముందుకు తీసుకొచ్చేందుకు ఏర్పాట్లు చేస్తున్నారు.
