మరికొన్ని రోజులు హోల్డ్‌లో పెట్టబోతున్నారా?
అల్లు అర్జున్-సుకుమార్ సినిమా ఇంకా ఆలస్యం కాబోతోందా. ఇప్పటికే పట్టాలెక్కాల్సిన ఈ చిత్రాన్ని స్టైలిష్ స్టార్ మరికొన్ని రోజులు హోల్డ్‌లో పెట్టబోతున్నాడా?
‘రంగస్థలం’ వంటి భారీ హిట్ తర్వాత దర్శకుడు సుకుమార్ కొత్త చిత్రాన్ని పట్టాలెక్కించలేకపోయాడు. మొదట మహేశ్‌తో అని ఆ తర్వాత అల్లు అర్జున్‌తో సినిమాని కన్ఫమ్ చేశాడు ఈ క్రియేటివ్ జీనియస్. బన్నీ సినిమా స్క్రిప్ట్ ఓ కొలిక్కి వచ్చినా చిత్రాన్ని సెట్స్‌పైకి తీసుకెళ్లాడానికి స్టైలిష్‌స్టార్ ఇంకా గ్రీన్‌సిగ్నల్ ఇవ్వలేదట.
దసరా కానుకగా బన్నీ-సుకుమార్ చిత్రం ముహూర్తం ఉంటుందనే ప్రచారం జరిగింది. అయితే బన్ని… సుక్కూ సినిమాని మొదలుపెట్టకపోవడానికి కారణం ‘అల వైకుంఠపురంలో’ చిత్రమట. ‘నా పేరు సూర్య’లో మిలటరీ గెటప్‌లో కనిపించిన అల్లు అర్జున్.. త్రివిక్రమ్ ‘అల వైకుంఠపురంలో’ కోసం బాగా జుట్టు పెంచి కొత్త లుక్‌లోకి మారాడు. ఇక సుకుమార్ సినిమా అంటేనే హీరో వెరైటీ మేకోవర్‌తో కనిపించాల్సి ఉంటోంది. దీంతో నవంబర్‌‌లో త్రివిక్రమ్ చిత్రాన్ని పూర్తిచేసి ఆ తర్వాత మొత్తం సమయాన్ని సుకుమార్ చిత్రానికి కేటాయించాలనుకుంటున్నాడట బన్నీ. మరోవైపు దిల్‌రాజు నిర్మాణంలో వేణు శ్రీరామ్ తెరకెక్కించే ‘ఐకాన్’లోనూ అల్లు అర్జున్ నటించాల్సి ఉంది. అది ఎప్పటినుంచి అన్నది తేలలేదు. మరి మంచి హిట్ కోసం గ్యాప్ తీసుకున్న బన్నీకి రాబోయే ఈ చిత్రాలు ఎలాంటి విజయాల్ని అందిస్తాయో చూడాలి.
