సందేశాత్మక కథాంశాలను వెండితెరపై అద్భుతంగా ఆవిష్కరించే శంకర్.. 23 ఏళ్ల తర్వాత ‘ఇండియన్’కి సీక్వెల్ చేస్తున్నాడు. తొలి భాగంలో ‘భారతీయుడు’గా ఆకట్టుకున్న విశ్వనటుడు కమల్ హాసన్ సీక్వెల్‌లోనూ కరెప్షన్‌పై కదం తొక్కబోతున్నాడు. లైకా ప్రొడక్షన్స్ నిర్మాణంలో ఈ ఏడాది జనవరిలో ప్రారంభమైన ‘ఇండియన్-2’ ఓ షెడ్యూల్ పూర్తయ్యింది. రెండో షెడ్యూల్ రాజమండ్రిలో ప్రారంభించ బోతున్నాడట శంకర్. అందుకే ఇటీవల రాజమండ్రి వచ్చి ‘ఇండియన్-2’కి అనుకూలంగా ఉండే లొకేషన్లను పరిశీలించాడట. ఆగస్టు నుంచి రాజమండ్రిలో షూటింగ్‌ను మొదలుపెట్టడానికి సిద్ధమవుతోందట చిత్ర బృందం.
రాజమండ్రితో పాటు రామోజీ ఫిల్మ్ సిటీలో మేజర్ పోర్షన్ చిత్రీకరించడానికి సన్నాహాలు చేస్తున్నాడట శంకర్. విడుదలైన ‘ఇండియన్-2’ కమల్ హాసన్ ప్రి-లుక్ పోస్టర్స్.. ఓల్డర్, వైజర్, డెడ్లియర్ అంటూ డిఫరెంట్ లుక్ లో అదరగొట్టాయి. కమల్ సరసన కాజల్, రకుల్ ప్రీత్ సింగ్, ఐశ్వర్య రాజేష్ కథానాయికలుగా నటిస్తున్నారు. ఇతర కీలక పాత్రల్లో సిద్ధార్థ్, విద్యుత్ జమ్వాల్ కనిపించనున్నారు. ‘ఇండియన్’కి ఏ.ఆర్.రెహమాన్ సంగీతాన్నందిస్తే.. సీక్వెల్‌కి అనిరుధ్ మ్యూజిక్ కంపోజ్ చేస్తున్నాడు. 2021 పొంగల్‌కి ‘ఇండియన్-2’ విడుదల కానుందట. మరి ‘భారతీయుడు’కి మించి సీక్వెల్ ‘భారతీయుడు-2’ సంచలనం సృష్టిస్తుందేమో చూద్దాం.
